തങ്ങൾക്കൊപ്പം

വളരാത്ത

പേരുകളെക്കുറിച്ചോർത്ത്

വ്യസനിച്ചിരിക്കുന്നു,

ഉന്നതശീർഷരെന്നും

നാരീരത്നങ്ങളെന്നും

യഥോചിതം

വിശേഷിപ്പിക്കാവുന്ന

കുട്ടു,

ഉമ്മുക്കുൽസു,

ഉണ്ണിക്കുട്ടൻ,

മാളു,

മുത്ത്,

ചക്കി

അമ്മു,

ചിക്കു,

വാവ,

മുതൽ പേർ.

കിളിപ്പാട്ട്

പെണ്ണ് കിട്ടുന്നില്ല
മുടിയാണ് പ്രശ്നം,
മുടി നീട്ടിവളർത്തിയ
ഒന്നാമൻ പറഞ്ഞു.

മുടിയാണ് പ്രശ്നം,
കഷണ്ടിയിൽ തലോടി
രണ്ടാമൻ ശരി വെച്ചു.

പരസ്പരം വെച്ച് മാറാനുള്ള
പ്രശ്നങ്ങളേ നിങ്ങൾ മനുഷ്യർക്കുള്ളൂ
എന്ന് മരക്കൊമ്പിലിരുന്നൊരു
കിളി  പാടി. 

അഭ്യുദയകാംക്ഷി

വാക്കവിടെ കിടക്കും,
കിടന്നോട്ടെ.
പക്ഷെ വല്ല പിള്ളാരും
അർഥം ചോദിച്ചാൽ
എന്ത് പറഞ്ഞു,
ആരെക്കാണിച്ചുദാഹരിക്കും?