പ്രണയാര്‍ബുദം

അകത്തളങ്ങളിലെവിടെയോ ആണ് മുളപൊട്ടിയത്.
'ഊം, അതുതന്നെ, അതുതന്നെ'.
പകല്‍ നിഷേധക്കുറിപ്പിറക്കി,
രാത്രി തലചൊറിഞ്ഞു ചികഞ്ഞു;
എപ്പോഴാണോ, എങ്ങിനെയാണോ?
കിരണചികില്‍സ നോക്കി
ഫലിക്കുന്നില്ല.
വൈകിപ്പോയെന്ന് വൈദ്യന്‍
വന്നുകിട്ടണ്‍ടേയെന്നു ഫലിതം പറഞ്ഞു.
മുള വളര്‍ന്നു, പടര്‍ന്നു
വെളളപുതച്ചുകിടക്കുമെന്നുറപ്പിക്കുവോളം,
ചത്തുമലര്‍ന്നുകിടക്കുമെന്നുറപ്പിക്കുവോളം.

മൈന്‍ഫീല്‍ഡ്

"പെണ്‍കുട്ടി ഒരു രാഷ്ട്രമാണ്" എന്നൊരു കവി.
കവേ, സര്‍വബഹുമാനത്തോടും കൂടി വിയോജിക്കട്ടെ;
പെണ്‍കുട്ടി ഒരു മൈന്‍ഫീല്‍ഡാണ്.
ഫലമില്ല, എന്നാലും പറയട്ടെ
'ജാഗ്രത, ജാഗ്രത'...ശ്രദ്ധയോടെ വേണം ഓരോ ചുവടും
പക്ഷെ എത്ര ജാഗരൂകനായാലും നിങ്ങള്‍ ചിന്നിച്ചിതറാം
ആകസ്മികമായൊരു സ്ഫോടനത്തില്‍.